玩具迷團 TOYSBUDDYHK

標題: 掉盒之心如何煉成? [打印本頁]

作者: ultraman147    時間: 2015-1-18 22:04:56     標題: 掉盒之心如何煉成?

掉盒之心如何煉成?


呢個聖誕節最爽既係,屋企個大櫃插針都插唔落,於是買咗三個姨媽玻璃櫃返來,趁聖誕放咗兩日假咁大把,瘋狂開盒入櫃,再掉盒,掉咗足足四十幾個,屋企又騰出空間,迎接2015...!!!


由細到大,都深明玩具入境係一件好艱難既事;好多人,尤其非玩具愛好者或者女士們(非得罪女士,只因同樣既偏見本人亦存在,玩具係男人既浪漫,手袋才是女人既偏愛),會話一早報關,多啲溝通就得啦,咪傻啦 ~ 細個同父母講,佢地會認為玩物喪志,“唔準買“;同老婆講,都係嗰句,玩物喪志,“唔俾買“...,報關多數只會換來“違禁品“標籤一個,所以我從不報關,只會偷運明運暗運入關...!


細個我覺得自己好聰明(而家都係),自己慢慢儲錢,夠錢就買,買完拆盒兼掉盒,件合金再拆走配件袋起,話俾爸爸知,呢件無包裝無飛拳兼甩翼既萬能俠,係同學仔唔要送既,入境後得閒就加返隻右拳,得閒就加返隻左拳,得閒就...,結果就成隻入境後重組重生,當然,小朋友玩玩具好粗玩,玩得兩玩絕對唔似新嘢。試過俾爸爸發現一隻完整既,我竟然話,對飛拳係另一個公仔既,或者當時啲公仔模型都好類似,尤其香港老翻製作,十款設計都一樣,所以當時呢個講法係合情合理既...!而且重點係“無盒可尋“...!!!


今時今日自己有一定程度既經濟能力,亦有自己既安樂窩,可能因為咁,自己就更加享受買玩具和玩玩具既樂趣;但亦如早前有師兄形容,件玩具明明可以用個iphone盒呎吋包裝,偏偏就造到降落傘咁大,可能而家啲玩具郁吓都幾百蚊起跳,兩三千亦好閒,所以觀感大件啲,會俾人覺得大食夾大件,抵返條數。雖然有基本既條件,但始於寸金尺土,七八千蚊尺價既樓,以現時樓價來講,幾乎要講聲好平(早幾日經過太古,真係聽到地產叫喊:好平呀,萬四蚊呎咋),用咁貴咁有限既資源去存放紙盒,真係覺得好窮奢極侈。


今年總共入咗九盒EX合金,其實呢條“奶“配件從來唔多,只係以設計,大隻,含金量取勝,九個盒形成咗條圖騰柱係屋企,真係唔知想點好?


有朋友建議租用迷你倉作為儲存玩具和吉盒之用,當屋企真係冇地方擺放唔落,而自己又不能脫坑既時候,租倉將暫不把玩既玩具存放都係一個方法,近屋企就更好,好似台灣故宮博物館咁,館後後山山洞成為天然保險庫,存放暫不展覽的物品,但會按時更換輪替。至於租倉用作存放吉盒,我一定唔會考慮,每月一千幾百,少數怕長計,租金攤放回玩具成本上,每件貴咗幾多都唔敢諗,有師兄話有盒先賣得好價,對唔住,我半件玩具都冇賣過,所入既只有一個原因 ~ 自己鐘意,所以唔會賣,而且即使如果用作炒賣,我唔相信玩具售價升幅多得過租金,所以啲盒大多數又係“無得留低“...!


“八角大師“呢個名詞都係係Y拍學到,估唔到原來有人堅持買玩具,會去到揀盒要八個直角既地步,呢種大師級恕我不能認同,甚至有啲走火入魔既程度;同時間我都識人比走火更甚,揀玩具一定要有雪梨紙,寧願隔住張雪梨紙去揀,揀好咗咪又係一手撕咗佢?呢個行為直頭俾我一種破處情意結既感覺,玩玩具玩到呢個境界,我呢啲凡夫俗子真係唔會明白!


小弟而家既處理方法係,第一層篩選:儲 ~ 如果儲既話,其實多數會入兩盒,儲嗰盒基本上開都唔會開,另一盒就開來玩;第二層篩選:玩 ~ 開盒過程全程影低做數碼記錄兼留念,配件說明書就搵“紅加藍變綠“密實保存,個盒連吸索發泡膠之類又係掉,久而欠之,掉盒已變成習慣。


當然,現時我們有幸能參觀及欣賞到古物連盒都要多謝和尊敬這些玩具收藏家,冇你地既執著和付出,我地肯定冇咁多嘢欣賞,不過能力愈大責任愈大,記錄歷史既責任交俾你地喇,我呢啲小玩家只能付出屋企既一角,舒緩吓工作既壓力而已...!


*** 每個人都有自己既生活態度,玩玩具既方式,以上純粹個人觀感和分享,不喜勿插。

pt2015_01_18_22_00_24.jpg




圖片附件: pt2015_01_18_22_00_24.jpg (2015-1-18 22:04:52, 446.04 KB) / 下載次數 18
http://www.toysbuddyhk.com/forum/upload/forum.php?mod=attachment&aid=MTI1MzE2fDYwOTJjYjMyfDE0ODA4MjQ1ODJ8MHww


作者: Pierre    時間: 2015-1-18 22:25:35

我的SIC開頭都連盒儲,但去到Vol3x時⋯都只可放棄,一於掉哂D盒,配件入密實袋! 以前成曰想儲齊成個series,而家只買喜歡的,話之你「限定」⋯
玩玩具最緊要開心,咪比佢玩返轉頭
作者: ultraman147    時間: 2015-1-18 22:28:18

Pierre 發表於 2015-1-18 22:25
我的SIC開頭都連盒儲,但去到Vol3x時⋯都只可放棄,一於掉哂D盒,配件入密實袋! 以前成曰想儲齊成個series, ...

完全同意,最緊要開心...
作者: Torneo    時間: 2015-1-18 22:37:52

其實有冇人高價收購玩具盒??
作者: godmyths    時間: 2015-1-18 22:51:56

掉盒其實需要很大的決心
作者: 葵扇煙    時間: 2015-1-18 23:29:27

我唔捨得掉盒。盡量少開line... 只玩新出超合金+老變mp, 其實都好大鑊。
其餘robot魂/shf嚴選。
作者: ultraman147    時間: 2015-1-19 00:02:17

Torneo 發表於 2015-1-18 22:37
其實有冇人高價收購玩具盒??

高價放盒就見過
作者: roystoy    時間: 2015-1-19 00:14:19

暫時 sic,  shf,  revoltech,模型,盒必掉
作者: simon.chiang    時間: 2015-1-19 07:38:23

其實有D盒的BoxArt好靚,可以考慮cut開保留封面
作者: ultraman147    時間: 2015-1-19 07:45:06

simon.chiang 發表於 2015-1-19 07:38
其實有D盒的BoxArt好靚,可以考慮cut開保留封面

EX啲盒我攞來裝其他玩具配件
作者: rockyfung    時間: 2015-1-19 09:34:30

呢個心真係好難練
作者: ILoveToy    時間: 2015-1-19 10:24:46

師兄的決心真大,掉盒唔係個個做到,我最多都係掉revoltech啲盒,所以而家入貨都會搵焦盒二手的,可以平啲同無咁阻地方
作者: 老文    時間: 2015-1-19 11:21:55

我情願買少D,但唔掉盒,其實係慳左
作者: toysbuddyhk    時間: 2015-1-19 11:30:54

呢個境界真係已經超越一切!分件上架!轉移視線!高明!高明!最緊要有盒有真相!冇盒就係什麼都沒有!!!勁呀!!!
作者: ahwai    時間: 2015-1-19 12:57:08

葵扇煙 發表於 2015-1-18 23:29
我唔捨得掉盒。盡量少開line... 只玩新出超合金+老變mp, 其實都好大鑊。
其餘robot魂/shf嚴選。 ...

同意葵扇煙師兄「嚴選」玩法!
除咗一小部份已完成嘅模型,其他尐盒都儘量保存,不過我藏量好小,所以唔係咁大問題。香港地地方細,有時想收藏下都真係幾煩。
作者: ahwai    時間: 2015-1-19 12:57:51

ultraman147 發表於 2015-1-18 22:28
完全同意,最緊要開心...

完全同意 X 2!!!
作者: 老力    時間: 2015-1-19 13:00:42

玩具係買黎玩,除非係暫時無咁多 色櫃 及 空間 擺出來,若唔開盒買黎做乜呢!

『八角星人』真係無野好講,而『破處一族』更加無言,真係來自『那媽星的你』!
作者: ronaldha    時間: 2015-1-19 13:03:48

老文 發表於 2015-1-19 11:21
我情願買少D,但唔掉盒,其實係慳左

Me2
作者: Iggy    時間: 2015-1-19 13:09:53

我之前都係唔捨得d盒, 一屋都係.......因為覺得件玩具如果冇左個盒就會唔值錢
不過老婆大人一語中矢話就算件玩具升左幾多倍都好, 我都係唔會捨得拎去賣架啦, 佢重話如果唔掉d盒咁邊有位買新玩具wor

老婆大人嘅話又真係幾有point, 所以我唯有乖乖遵從啦
作者: js682    時間: 2015-1-19 13:20:25

Pierre 發表於 2015-1-18 22:25
我的SIC開頭都連盒儲,但去到Vol3x時⋯都只可放棄,一於掉哂D盒,配件入密實袋! 以前成曰想儲齊成個series, ...

完全同意 現在好多人買玩具都只是博升到天價可以賺錢 所以唔開盒

作者: js682    時間: 2015-1-19 13:22:21

我和樓主一樣 都是掉盒派
作者: 葵扇煙    時間: 2015-1-19 13:46:43

仲有我反而係儲盒,而選擇唔 display...
要玩/ 想玩就再開盒。我好享受每次開盒果種滿足感。
作者: toysbuddyhk    時間: 2015-1-19 14:28:50

老力 發表於 2015-1-19 13:00
玩具係買黎玩,除非係暫時無咁多 色櫃 及 空間 擺出來,若唔開盒買黎做乜呢!

『八角星人』真係 ...

完全同意!!
作者: wwwkcc    時間: 2015-1-19 16:11:28

我就Robot魂同SR合金盒必掉,再買個箱裝起晒佢哋,有啲個盒大但得幾樣嘢嘅又係必掉
作者: sean    時間: 2015-1-19 21:47:07

我只掉運輸盒
作者: garyfai    時間: 2015-1-20 00:11:27

儲玩具一定要儲埋個盒(個人意見因我儲舊玩具的)
作者: ultraman147    時間: 2015-1-20 00:26:44

garyfai 發表於 2015-1-20 00:11
儲玩具一定要儲埋個盒(個人意見因我儲舊玩具的)

歸類為儲既,我都唔會掉盒。
作者: ultraman147    時間: 2015-1-20 00:27:36

js682 發表於 2015-1-19 13:22
我和樓主一樣 都是掉盒派

同道中人
作者: ultraman147    時間: 2015-1-20 00:29:33

toysbuddyhk 發表於 2015-1-19 11:30
呢個境界真係已經超越一切!分件上架!轉移視線!高明!高明!最緊要有盒有真相!冇盒就係什麼都沒有!!! ...

其實我可說是拆件走私既鼻祖...
作者: lancer1    時間: 2015-1-20 06:15:03

葵扇煙 發表於 2015-1-19 13:46
仲有我反而係儲盒,而選擇唔 display...
要玩/ 想玩就再開盒。我好享受每次開盒果種滿足感。 ...

me too

作者: lancer1    時間: 2015-1-20 06:18:55

唔係人人都好似你咁幸福,有個俾show玩具出嚟嘅老虎架嘛!
作者: toysbuddyhk    時間: 2015-1-20 11:50:43

lancer1 發表於 2015-1-20 06:18
唔係人人都好似你咁幸福,有個俾show玩具出嚟嘅老虎架嘛!

唔係人人都好似你咁幸福, 有個係咁俾你入貨都唔理你嘅老虎架嘛!!
作者: aching878    時間: 2015-1-21 10:49:58

我也是掉盒派

我的決心 = 更多的空間 = 更多的新玩具

掉盒派萬歲
作者: johndeere1100    時間: 2015-1-26 07:14:21

真心佩服所有掉盒的師兄!
我都爆哂廠了, EX合金+合金魂+HOTTOYS+CMS及SR合金, 屋企無可能放得落, 偷偷塞在公司, 擔心如果要掉職真係吾知點算
但真係吾捨得掉盒, 因為每一隻都覺得是珍藏, 盒設計亦是玩具的一部份, 玩之前欣賞個BOX ART 亦是一大樂趣
作者: revy    時間: 2015-1-26 10:32:10

我都開始練緊呢個心法第一層
作者: X-man    時間: 2015-1-28 05:49:18


作者: gazza1211    時間: 2015-1-28 20:28:57

發達、大把錢,自然就丟盒啦。(我留盒的其中一個原因,是因為希望有一天唔想要某件玩具時間,有盒就能賣得貴一點。)
作者: Nela    時間: 2015-2-12 22:03:13

我搬了新屋後,一次過把合金魂,神話盒丟了
只留下有合金魂合打開見到彩卡紙在發普膠蓋下面果D 如大帝,獅王等

有D合要放到L形廚櫃下格死角內。。。
作者: ekim11    時間: 2015-4-11 14:14:55

我都開始掉盒了,真係很阻地方
作者: sean    時間: 2015-4-11 14:39:35

我只有勇氣掉運輸盒




歡迎光臨 玩具迷團 TOYSBUDDYHK (http://www.toysbuddyhk.com/forum/upload/) Powered by Discuz! X2