玩具迷團 TOYSBUDDYHK

 找回密碼
 立即註冊
搜索
查看: 5086|回復: 31

[EX,ES 合金] 五人戰隊之始祖 - 神勇飛鷹俠 [複製鏈接]

Rank: 9Rank: 9Rank: 9

發表於 2013-8-6 21:11:31 |顯示全部樓層
本帖最後由 benbenben4213 於 2013-8-6 21:30 編輯

各位師兄,又見面嘞

先旨聲明,D相既數量及質量都未必合乎各位師兄既預期,不喜勿插

首先黎既係人物篇:

大鷲之健




跟住出場既係......................

無嘞,其實要出場既只有隊長阿健,無其他隊員嘞

「有無攪X錯,係唔係呃POST呀,X街」

冷靜、冷靜,請各位師兄唔好講粗口住,先聽小弟解釋

點解淨係得阿健呢,唔係我唔想買,而係因為死人 TARAKA 出左一 SET 龍之子英雄之後就無再出餘下四位成員嘞。所以我相信係短期之內想儲齊一隊微超版神勇飛鷹俠都係無咩可能了﹗(起碼要到明年CG電影上先可能有D機會)

講番呢 SET 玩具,好似係為左慶祝龍之子開立20週年而出既。成 SET 有5 個龍之子英雄,分別係大鷲之健、破裡拳、新造人間、宇宙騎士、電光石火。

因為對其他的人物無愛,所以只入手大鷲之健了

其實神勇飛鷹俠既人物玩具相對戰機黎講,可以算多的了,有 12" FIGURE、有 Q版公仔、有搪膠扭旦等等。

但一來無玩開 12" ,二來扭旦只可以一舊野放係度,所以就只有這個微超版最合我心水。

玩過微超既師兄都知,公仔除了身上一定有勁多活動關節外,亦附有多個手掌及武器,可隨意擺出有型姿勢,真係想點都得。唔知TAKARA 會唔會出埋其餘的隊員,完成我全員集合之心願呢。

以上就係小弟既解釋,唔知各位師兄接唔接受呢﹖

吓,唔接受,仲想要多D

咁好啦,雖然已經無貨,但鬼叫撩起左各位師兄把火咩,唯有頂硬上啦。 (如果仲係唔鍾意,請各位師兄唔好打面)


使用道具 舉報

Rank: 9Rank: 9Rank: 9

發表於 2013-8-6 21:12:37 |顯示全部樓層
本帖最後由 benbenben4213 於 2013-8-6 21:17 編輯

戰機篇

一號機
  

由隊長阿健駕駛,空戰用機,劇中配備激光及機關槍 / 玩具則配備飛彈發射器於兩邊機翼下

二號機
  
由兀鷹阿丁駕駛,陸空兩用戰車,最高時速600公里,劇中配備迫擊炮 / 玩具配備飛彈發射器於車身上

三號機



由天鵝阿珍所駕駛,為雙渦輪迥旋直昇機,負責追蹤偵查,最高時速300公里,劇中配備機關炮 / 玩具配備飛彈發射器於兩邊機翼下

四號機




由燕子阿平駕駛,為海底用探險車,最高時速500公里,劇中配備小型火箭炮 / 玩具則在車頂上有發射裝置 (阿平因無位企,所以無出現

五號機

由貓頭鷹阿龍駕駛,為地面及地底用戰車,最高時速300公里,劇中配備機關炮 / 玩具在車身中間有發射裝置,另外車旁兩翼能轉動及拉上

五機合影


合體準備


五機合一,SPARTAN
  

SPARTAN 簡介:不同於之前的兩部鳳凰號,SPARTAN由一至五號機結合而成。根據劇情,因敵人變得更厲害,火鳳凰攻擊已無效,所以需要新的戰機再加上健所持有的飛鷹寶劍引發最強絕招,才能對付敵方。

攻擊流程 -  阿健會從座駕跳上機頂,取出寶劍大嗌﹕「五為一體,變為無敵火鳳號」,跟住全機充滿電流,並高速衝向目標,在最接近的時間,阿健便以手中寶劍斬破敵人。

發展到後期,阿健因過度使用此招,以致白血球壞死,患上血癌,生命危在旦夕。而餘下各人亦因南宮博士被殺及担心阿健身體負荷不了,以致影響作戰狀態 ,被敵人步步進迫。劇情到此亦步入最後高潮。
----------------------------------------------------------------------------------------------------------------------------------------------------

一口氣同各位師兄分享左各機體既性能同可玩之處嘞,唔知各位師兄夠喉未呢﹖

唔夠喉就睇埋下面啦


使用道具 舉報

Rank: 9Rank: 9Rank: 9

發表於 2013-8-6 21:15:22 |顯示全部樓層
本帖最後由 benbenben4213 於 2013-8-6 21:18 編輯

新舊版對照

以下有請各位師兄欣賞


最後加多張重量圖俾各位參考
         

後記 - 為新版三角朱古力做個簡評:

* 真正既超合金 - 重量十足,合金佔整體 85%,每隻機分開都有6,7寸長,0.5 kg左右重,此舊版大隻左又重左,好多年都無玩過咁足秤既合金玩具嘞。

* 經典再做 - 舊合金以當時技術來說已經係超哂班,成為一代經典。而新既呢隻除左在含金量上遠較舊合金高之外,在合體,變型系統各方面亦去蕪存菁,源用舊合金好處之餘,在每架機連接位亦內置加上 固定用膠件,只要一推或一按,無需再加任何額外配件,就可將機與機扣得緊密,唔會有鬆有甩既情況出現,把玩度大增,唔會再「有得睇無得玩」。

不過有小小要彈既就係無左 d 射飛彈位,無得攞黎射紙版敵人,童年樂趣大減。

另外,最遺憾最遺憾係無左「膠人仔」插在機頂上呢個設定,無法完全還原「火鳳凰」,硬係差少少野咁囉。

綜合以上個人意見,100 分滿分,我會俾 99 分,扣 5 分無得插人仔,但又加番 4 分俾整隻成品既誠意、設計、做工、材料。

呢輪玩過佢同十五機兩件 reboot 神物,兩者比較之下,含金量是不相伯仲既,但若論把玩流暢度及驚喜感,三角朱古力完勝

使用道具 舉報

Rank: 9Rank: 9Rank: 9

發表於 2013-8-6 21:18:16 |顯示全部樓層
後後記:

超時空要塞、V型電磁俠同神勇飛鷹俠,三套都係小弟最愛既卡通片。「有卡通就有玩具」,所以在能力範圍許何之下,小弟都會儘量收集佢地曾經推出過既玩具。

上兩期已經分享過兩樣超時空要塞既玩具,所以今次轉一轉話題,講神勇飛鷹俠。

飛鷹俠卡通是分三輯的,第一輯在香港播放時,小弟正在讀幼稚園既階段。以當時既年齡,當然唔會知道咩野叫劇情,但裡面所出現既影像已經把我吸引住了。為左做飛鷹俠,有時會拎嫲嫲張毯「嬲」係背脊當披肩,係梳化跳落地,又由地下跳番上去;有時又自己郁手郁腳打空氣,當空氣係 D 綠色卒仔係咁打。係唔係好白痴呢﹖

第二輯大約是在我小一時播的,當時人已大個小小,睇/聽得明故事做乜,終於知道佢地五個人叫飛鷹俠,阿健係隊長1號,而阿丁、阿珍、阿平同阿龍分別係2-5號。而佢地用既戰機亦都唔同左,每一架機既外貌係跟番駕駛者外號而設計的,所以變得更加有個性,最記得新鳳凰號真係成隻鷹咁樣架。

因為已經是小學生,群體活動多左,嗰時最鍾意同幾個同學仔係課室到一齊扮出火鳳凰。點扮呢﹖先係自己個位到担張「鄧」仔出黎,最前面一個、第二排兩個、第三排兩個咁坐,跟住就由最前嗰一個大嗌「火鳳凰」,然後就一齊好似鬼上身咁搖張「鄧」,扮哂俾火燒咁,宜家諗番都好開心。雖然玩之前講好每人扮一次阿健的,但通常坐低左都係賴死唔走既,當然包括我啦。

第三輯係在我讀5年級時播的,無記錯應該係每個星期日上午11:30 亞洲電視。我最鍾意既亦都係呢輯,一來因為本身已是FANS,二來戰機既設計實在太正了,既可單獨出擊、亦可合體戰鬥。但講到最無得頂既,就係阿健企係機頭到出絕招嗰野,嘩,駛唔駛咁型呀。

而我的第一件飛鷹俠玩具,正正就是上面介紹的SPARTAN嘞

後來因為要搬屋,大部份心愛玩具都散失了,包括此機及V型電磁俠,當時不覺什麼一回事,現在諗番就肉赤死了。

到左中學階段好小玩玩具,頂多砌下BB戰士。直至畢業出黎做野後,開始買番玩具,當時第一時間想買番就係此機了。

奈何,新品往往要買成一萬元以上,以小弟當時微薄既薪金,邊樹買得起。

過左好耐,本已打消購買念頭,正當萬念俱灰之際,適逢 Y 拍開始運作,在一次偶然之下,竟然比我發現到.........

一副二手既SPARTAN,開價$2,500.-。雖然盒已很殘舊,但玩具卻有七成新,而且部件齊全。二話不說,即刻下標,幸好當時 Y 拍並不是那麼流行,苦等三日,成功競投。

可能有師兄會覺得用$2,500.-買一件殘舊二手貨好唔抵,但在於我黎講就覺得物超所值嘞﹗

點解﹖因為我覺得新、舊、貴、平只可衡量玩具既表面價值。但真正價值呢,就只有係你手中把玩時才可找到,嗰樣野就叫做忘憂。你諗下,當你玩緊玩具既時候,所有注意力都集中在玩具上,係嗰一刻你就可以暫時忘記不快事,開開心心咁玩番餐,這是用多多錢都買唔到既。更何況,除左忘憂,我仲可以搵番童年回憶,乜野都抵番哂啦﹗

唔經唔覺,又寫左咁多字,睇怕都係會悶親各位架嘞,還是就此收筆好了。

再次多謝各位師兄觀看,下次見,BYEBYE


使用道具 舉報

Rank: 9Rank: 9Rank: 9

發表於 2013-8-6 23:24:19 |顯示全部樓層
好有水準既報告!最鐘意可以回到過去既故事內容!最後有病既健健會係點架,因為當還好細,冇咩印象!Ben 兄可唔可以講多小小結局呀!?

使用道具 舉報

Rank: 4

發表於 2013-8-7 02:13:35 |顯示全部樓層
實在太利害..ben兄此post介紹實在精彩,相當詳盡,對飛鷹俠相當有愛,佩服佩服!!!...但..阿健最後點啫??

使用道具 舉報

Rank: 8Rank: 8

發表於 2013-8-7 08:28:25 |顯示全部樓層
超級水準既報告!

使用道具 舉報

Rank: 10Rank: 10Rank: 10

發表於 2013-8-7 09:47:27 |顯示全部樓層
我認輸啦!

賓賓個post實在太強大啦!

使用道具 舉報

Rank: 10Rank: 10Rank: 10

發表於 2013-8-7 10:24:36 |顯示全部樓層
好post好相好文好周賓.........

我印象....等一集飛鷹俠7x年.....夜晚播....果時淨係知亞珍條老底係白色

使用道具 舉報

Rank: 7Rank: 7Rank: 7

發表於 2013-8-7 10:51:12 |顯示全部樓層
我反而鍾意舊版多d

使用道具 舉報

您需要登錄後才可以回帖 登錄 | 立即註冊

聯絡我們|廣告查詢|手機版|免責聲明|私隱政策|網站地圖|玩具迷團 TOYSBUDDYHK ( TOYSBUDDYHK ©2016, All Right Reserved. )

GMT+8, 2016-12-8 00:26 , Processed in 0.039506 second(s), 13 queries .

Powered by Discuz! X2

© 2001-2011 Comsenz Inc.

回頂部